Lo Cine-Club Òc contunha sus son aviada ! À l'escasença du
Mois du Film Documentaire, l'associacion Tu Tanben e lo CIRDÒC meton a l'onor lo cinèma de l'Ostau Comengés. Dos filmes seràn presentats per Matiu Faure, qu'a participat a lor produccion/realizacion amb l'Ostau. Una dintrada en matèria de las bèlas per descobrir lo ric patrimòni festiu e culinari del Comengés.
Era Hesta deth Pòrc (Renaud Lassalle, 2017) :
Que siá dicha « fèsta del pòrc », « pelèra » o « pèla-pòrc », s'agís solide d'un bon moment. Dètz informators explican cossí se debanava – e se debana encara - « la mai bèla fèsta de l'annada » a Nistòs, en Comenge e en Coserans : cossí noirir lo pòrc, cossí lo tuar, preparar los budèls, l'importància de la luna, qué faire dels pèls, del fèl, de la vessiga, cossí lo trocejar, cossí faire la fèsta... Gaitatz plan : dins lo pòrc, tot es bon !
Un documentari etnografic en occitan de l'Ostau Comengés.
Les violonneux traditionnels entre Comminges et Couserans (Pierre Rouch, 2018) :
Dins lo lengatge familiar, un "violoneux" designa un violonista mediòcre, mas pas aici. Los "violoneux" que ne parlam jògan una musica populara, tradicionala o folclorica ; an pas forçadament de formacion classica en musica, mas an aprés amb los autres "violoneux". Dins aquela region entre Comengés e Coserans (Pireneus centrals), Pierre Rouch a menat un vertadièr trabalh de recèrca sus aqueles musicians dels vilatges, e sus lo ròtle social que joguèron dins lo passat : quin èran lors foncions, lors estatuts, lor personnalitat ? Quin èran los ligams entre lor practica musicala, lo territòri, la societat ?