Los còps de còr del CIRDÒC per Nadal

Publicat lo 02 decembre per Sandra Juan propausat per CIRDOC-Mediatèca occitana

Las fèstas de Nadal apròchan e amb elas, los presents, per ofrir o per se far plaser. Vos propausam una seleccion dels nòstres còps de còr demest las darrièras parucions DVD, CD, libres… e atanben qualques doçors, per festejar en familha un Nadal en òc.
E vos ? Que seràn los vòstres presents per Nadal ? Partejatz las vòstras idèas en comentari.

Descobrir nòstra seleccion musicala e literària per mièlhs garnir lo pè del vòstre sap : Aquí.

1.Portfòlio : Arbres - Georges Souche, Edicions Cardabelle

Georges Souche, las edicions Cardabelle e lo CIRDÒC vos convidan a descobrir unes dels grands poètas occitans del sègle XX. Arbres son 12 cartas postalas que propausan 12 extraches de poèmas de Leon Còrdas, Max Roqueta, Marcèla Delpastre, Renat Nelli... Las fotografias de Georges Souches venon faire resson an aqueles tèxtes a l’entorn d’una meteissa figura emblematica, l’arbre. Perseguissètz la descobèrta en linha amb la mòstra virtuala Voses de la modernitat, gràcias a un sistèma de ligams e de flashcodes.
Site de las edicions Cardabelle.


2. Qualques abonaments de premsa

La Setmana vos propausa articles e entrevistas, vertadièra tribuna per l’actualitat occitana coma nacionala o internacionala. Sos jornalistas s'estacan a ofrir d’articles dins las divèrsas variantas de l’occitan, fasent d’aquel setmanièr un mèdia ideal de descobèrta e d’aprendissatge d’aquela lenga e de sa cultura.
E per los mai joves, las revistas Papagai e Plumalhon vos balhan rendètz-vos cada mes per legir, descobrir, viatjar e jogar en occitan (lengadocian o gascon, a la causida). 

Entresenhas e abonaments.


Politica, societat, cultura, educacion : Aquò d'aqui , mesadièr provençal d'informacion bilingue (francés-lenga d’òc), espepissa l’actualitat locala coma nacionala. Preocupat per la democratisacion e la socialisacion de la lenga, Aquò d’aqui fa la causida d’ofrir una granda partida de sos contenguts en accès gratuit sus son site Internet mas propausa als abonats de la version de papièr dorsièrs tematics, cronicas e fulhetons en exclusivitat. 
Entresenhas e abonaments.

3. Literatura joinesa : Antoni o la resisténcia. D’Espanha al relarg tolosenc. De Valentine Goby e Ronan Badel, Canopé Edicions

Virat cap als pichons coma als grands, aqueste obratge propausat per Canopé Edicions relata l’arribada e los primièrs moments d’un jove refugiat espanhòl dins lo Lengadòc de 1939. Un roman istoric plen de sens e completat per un dorsièr documentari instructiu. Aqueste roman joinesa es propausat en occitan gascon, lengadocian e lemosin.

Antoni o la resisténcia disponible al prèp de l’editor, Canopé e de Découvertes occitanes, la librariá occitana d’Auvèrnhe. 


4. Novèlas : Esperit de Sau de Matieu Poitavin, Edicions L’aucèu libre

Per 3 novèlas, Matieu Poitavin empòrta son lector dins un ambient fantastic. Esperit de Sau es la darrièra parucion del jove autor gardenc, dont l’òbra posa dins los medias e creacions contemporanèus : cinèma, musica, clips e literatura populara.
Comprar Esperit de Sau a las Edicions L’aucèu libre. 


5. Benda dessenhada : 1907, La Révolte des vignerons de Paul Astruc - Edicions OC

Mars 1907, lo malcontentament es creissant demest los viticultors del Lengadòc e del Rosselhon. Marcelin Albert se fa lo pòrtavotz d’aquela gronhadissa e deven per qualques meses l’Apòstol dels "gusses". L’obratge inclutz un documentari istoric : 1907, l’histoire, le mythe realizat per Christian Salès.
Ofrir la BD.

6. Recuèlh de cants : Se canta que Cante per CORDAE/La Talvera  

La version revista e augmentada de l’indispensable recuèlh de cançons de La Talvera. Que cantetz dins la docha o dins una corala, es accessible a totes, e presenta 165 cants del repertòri tradicional occitan acompanhats d’una traduccion e d’una particion musicala.
Per las fèstas de fin d’annada, La Talvera fa de promocions sus son catalòg. Es lo moment de ne profechar. Per ne saber mai sul recuèlh. 


7.  DVD : Lo Pichon Gruffalò,  Conta'm

Para lo Pichon Gruffalò ! Darrièra adaptacion d’un dessenh animat en occitan per l'estúdio Conta’m. Lo Pichon Gruffalò es ara disponible en DVD coma lo son ja Ernèst e Celestina, Una plaça sus l’escoba, Brendan e lo secret de Kells o encara Kerity, l’ostal dels contes… Los pichons e los mai grands se ne faran fèsta !

Lo gòrb de DVD de Conta’m. 

 

8. Antologia :  Grains of Gold - Jos la direccion de James Thomas,  Francis Boutle Publishers

Un cadèl indispensable per los anglofòns : la frucha de dètz ans de recèrca e de traduccion, aquela antologia critica de l’escrich occitan recampa al fial de 800 paginas los grands tèxtes de la literatura occitana, presentats e plaçats dins lors contèxtes istoric e cultural per James Thomas. Prèmi Ostana d’escritura en lenga maira 2015. 

Disponible dins la vòstra librariá occitana (Libraria occitana de Limoges, botiga de l'IEO Lengadòc a Besièrs, Ostal del Libre d'Orlhac…). 

Descobrir la colleccion de l’editor consacrada a las lengas minorizadas d’Euròpa (site en anglés).

 

9.  Literatura joinesa : Contes de la Calandreta. Andrieu Lagarda, Edicions Letras d’Òc

Per los enfants qu’aprenon l’occitan e per lors parents, Andrieu Lagarda a recampat de racontes tirats de la tradicion populara occitana coma de totas las tradicions d’Euròpa. Un recuèlh illustrat per Sofia Vissière, de descobrir a las edicions Letras d’òc, que dedica tanben tota una colleccion als albums joinesa.

Disponible en linha al prèp de l’Espaci occitan dels Aups e de l'editor Letras d'Òc. 

 

10. DVD : Une histoire occitane / Una istòria occitana, Jean-Pierre Vedel - Marmitafilms

De la Nòva cançon a la scèna contemporanèa, retorn sus 50 ans de creacion e de revendicacion occitanas en musica. Un documentari en francés produsit per Marmitafilms en 2015. Durada : 52 minutas.
Informacions / Comprar sul site del productor.
Disponible en linha al prèp de Découvertes occitanes.

 

11. Poesia musicala : Ara per Rodín

Un vertadièr album-paisatge dins lo qual se refugir se volètz trapar un monde mens bassament material.
5 € en version numerica, directament sul site de l'artista.

 

 

12. Polifonias : Ligams de Vox Bigerri

Per sos dètz ans, lo grop Vox Bigerri produtz l’album Ligams que balha la part bèla als cants sortits de la practica conviviala e espontanèa de las cantèras bigordanas e bearnesas. De classics del repertòri tradicional occitan sublimats per l’interpretacion modèrna dels 5 cantaires del grop.

Aquel album, e encara mai, son disponibles sus la botiga en linha del Fil e en çò de totes los libraris e discaris occitans.

13.   Oratòrio : La Fin dau monde de Bruno Rossignol e Jean-Yves Agard

En 2013, Bruno Rossignol creava sus de tèxtes de Jean-Yves Agard un oratòrio per 150 musicians e cantaires. Per lo biais d’un conte que met en scèna una familha peiregordina jos la tempèsta pendent lo ressopet del jorn de l’an,  aquela creacion contemporanèa s’interèssa de prèp a la transmission culturala de la lenga occitana. L’ensemble de las particions d’aqueste oratòrio (conductor, material d’orquèstre e coristas) es disponible sul site de las edicions Delatour.
 

14. Doçor : La Calina - Le Fournil de Gilles


La colleccion Trésors d’Occitanie del Fournil de Gilles vos propausa una seria de còcas e pastissariás per encantar los vòstres vespralhes de fèstas. Darrièra creacion en data, la Calina ofrís una descobèrta gustativa de las riquesas del terrador audenc. 
Tastar la Calina.


15.  Per los qu’aiman èsser en avança sus lor temps

Dos bèls projèctes que sortiràn en 2016 mas son ja dobèrts a soscripcion.

Cançonièr totemic lengadocian, Marie-José Fages-Lhubac, Josiane Ubaud, Jean-Michel Lhubac, Edicions Trabucaïre.

Lo tresen tòme del cançonièr totemic lengadocian met sus papièr e en particions los cants, devinalhas, aires e jòcs de l’enfància que cadun porta en el. Illustrat per Pierre François, aquel tresen tòme s’interrèssa als moviments qu’animan los rituals ancestrals de la tradicion lengadociana, los que ligan lo mainatge a son environament.
Retrobatz mai d’informacions sus La Fabrica.

Projècte Leon Còrdas, collectiu Còp’Sec

Quand un collectiu d’artistes contemporanèus s’empara de l’òbra de Leon Còrdas, ressona  segurament mai luènh que dins lo Menerbés. Los artistes sòcis del collectiu Còp-Sec desiran tornar editar l’òbra del poèta tenent tanben en compta sa dimension musicala. Aital, son La Mal Coiffée, Lo Barrut, Du Bartàs, Grail’oli, Hum, Urban Balèti, Touristar, Mauresca, Laurent Cavalié e Mariana que donaràn dins pauc de temps una votz a l’òbra poetica del poèta-pagés.

Per ne saber mai sul projècte.

E per trapar lo vòstre bonaür : vestits, pegasolets, calendièrs… una seleccion de qualques sites per faire las vòstras crompas en linha (lista non exaustiva).

Adishatz 
AELOC
Centre culturel occitan du Rouergue 
Chambra d'òc  
Edite-moi 
Espaci occitan dels Aups / Descobrir sa seleccion de Nadal
Eth Ostau Comengés 
Ideco 
La Lauzeta 
Lo País Polit daus Potonors 
Macarel
Sirventés  
La Tuta d'òc
Vent Terral  

Daissatz un comentari

<