X

21

Jul

Lo CIRDÒC partís en Estivada : rendètz-vos a Rodés del 21 al 23 de julhet

Publicat lo 19 julhet per Sandra Juan; CIRDÒC propausat per Ville de Rodez

Coma cada annada a aquel periòde, lo CIRDÒC, partenari de l'Estivada, vos espèra a Rodés per tres jorns de festivitats a l'entorn de la lenga e de la cultura occitanas. Del 21 al 23 de julh, la Mediatèca occitana vos propausa sa programacion literària per anar al rencontre dels autors e editors contemporanèus. E rendètz-vos cada jorn sul nòstre estand per nos encontrar e escambiar.  

 

Lo dijòus 21 de julh

16h30 – MJC de Rodés
Balat, la balle qui danse : cine-concèrt inspirat de l'òbra poetica de Joan-Ives Roier

Balat es un cine-concèrt de creacion, liurament inspirat de l’òbra poetica de Joan-Ives Roier, cantat per Renat Sette e acompanhat al pianò per Olivier Maurel. Lo film, entièrament tornat en país de Forcalquièr sus una annada completa, es una errància poetica : i seguissèm un dròlle que cèrca la bala qu'a perduda, acompanhat per un fantaumatic matagòt que li dobrís las pòrtas d'un monde oniric, fantasiós, ont se pòt desplegar la grandor de sos sòmis d'enfant. Balat propausa un agach lucid e tendre, tintat d'ironia, sus l'uman.

Lo divendres 22 de julh

A partir de 10h : Aperitiu literari – Capitèl dels editors


- 10h : La pròsa occitana

Amb Matieu POITAVIN, Jaumes PRIVAT, Jaume LANDIÈR, las edicions L’Aucèu libre

Jaume Landièr es nascut en 1952 dins Erau. Amorós de son territòri, seguís amb fervor los movements viticòlas. Participa a d'experiéncias de teatre e ensenha, entre autras causas, l'occitan. Matieu Poitavin, Provençal d'Aigas Mòrtas, jove escrivan e professor d'occitan, s'inspira de las arts visualas e de las culturas del monde. Amb son amic Jaume Privat, e acompanhat per son editor L'Aucèu libre, Matieu Poitavin presentarà sos darrièrs  dos obratges, Esperit de sau (Esprit de sel), recuèlh de tres novèlas als accents fantastics, e Sus lei piadas de l'absenta (Ed.Atelier Baie), passejada fotografica e d'escrivan a la quista de Nimes l'occitana.

 

- 11h30 : Cantar e dansar per transmettre

amb Mirelha FALCA de las edicions Trabucaïre, Marie-José e Jean-Michel LHUBAC, a l'entorn del 3en volum de lor Cançonièr totemic lengadocian (Ed. Trabucaïre, co-escrich amb Josiana UBAUD, ill. Pierre FRANÇOIS)

Lo darrièr volum del monumental e indispensable Cançonièr totemic lengadocian ven de sortir. Venètz rencontrar Jean-Michel e Marie-José Lhubac acompanhats de las edicions Trabucaïre, que vos parlaràn d'aquela fabulosa entrepresa de recuperacion e de transmission dels gèstes, rites e culturas musicalas lengadocianas als enfants. 

A 16h30 : Animacion literària - Archius departamentals d'Avairon : Omenatge a Ives Roqueta

Omenatge a l'Ives Roqueta, desaparegut en genièr de 2015. Immense escrivan, poèta, traductor, òme d'engatjaments e de combats nombroses per l'inscripcion de la lenga e de la cultura occitanas dins la modernitat, Ives Roqueta a marcat d'una manièra prigonda l'escritura e l'accion occitanas contemporanèas. Maria-Joana Verny, professora de literatura occitana contemporanèa a l'Universitat Paul-Valéry de Montpelhièr, presentarà l'òbra de "l'escriveire public". Charradissa seguida d'una projeccion del film En camin amb Ives Roqueta (Realizacion : Myriam François. Imatges : Jean-Pierre Duntz. Montatge : Ève Ducau).

 

Lo dissabte 23 de julh

 

A partir de 10h - Aperitius literaris - Capitèl dels editors


- 10 h : L’actualitat literària occitana
Amb Miquèla STENTA, Jòrdi BLANC (Vent Terral) e Tierric OFFRE (Jorn)


Miquèla Stenta e las Edicions Vent Terral vos parlaràn de la vida particulara de Marcela Delpastre, figura femenina de la poesia occitana contemporanèa. Autora e editritz de sa biografia vos prepararàn aital al rendètz-vos de l'endeman, una lectura a tres voses de son òbra. En abans-primièra, Tierric Offre, meteorològ e escrivan occitan, presentarà son obratge de paréisser a las edicions Jorn, Lo Luec d'enluec. 

- 11h30 : La cosina occitana
Amb Jòrdi BLANC (Vent Terral), Joan BLANC (Vent Terral) e Claudia LABADENS (Per Noste).

A l'entorn del libre La Cosina a vista de nas d'Enriqueta Guilhèm (edicions Vent Terral), Joan Blanc presentarà lo tresaur de la cosina occitana de las familhas lengadocianas mentre que Claudia Labandes, editritz de Bona hami ! (de Sofia Laborde, edicions Per Noste) vos menarà a la descobèrta de las recèptas gasconas passadas e actualas. 

 

A 16h30 : Animacion literària - Archius Departamentals d'Avairon : Marcela Delpastre - figura femenina de la poesia contemporanèa 

Amb Teresa CANET, Monica BURG et Jan DAU MELHAU

Marcela Delpastre, agricultritz dins Lemosin, se passeja pas jamai sens son gredon negre e un quasèrn. Son primièr poèma en occitan, La lenga que tant me platz, pareis en 1964. Per una lectura a tres voses, Teresa Canet, Monica Burg e Jan dau Melhau vos menaràn per un rencontre poetic e contat en Lemosin, qu'evòca la vida e l'òbra de la poetessa occitana. 

Daissatz un comentari

<