X

09

Mai

« Culturas popularas en dialòg » - Venètz ambaissador de vòstras tradicions

Publicat lo 03 mai per CIRDOC-Mediatèca occitana propausat per CIRDOC-Mediatèca occitana

 

Lo CIRDOC, la Fira Mediterrània de Manresa e la Fira de Teatre Infantil de les Illes Balears vos convidan 
lo 9 de mai de 2017 a 16h00
al CIRDÒC-Mediatèca occitana 
1 bis Boulevard Du-Guesclin 34500 Besièrs (França)
a la presentacion e als primièrs escambis publics a l'entorn del projècte « Culturas popularas en dialòg »


Seguits a 18h00 del vernissatge en musica
de l'exposicion 
« Fèstas de fuòc dins Pirenèus »
en partenariat amb la Generalitat de Catalunya e lo sosten de l'Unesco




Un an aprèp lo primièr Forum euroregional dels actors de la cultura e de la creacion, lo CIRDÒC e sos partenaris, la Fira Mediterrània de Manresa, e la Fira de Teatre Infantil (FIET) de les Illes Balears, vos convidan lo 9 de mai a 16h pel lançament de l'operacion « Culturas popularas en dialòg ».

Associacions, confrariás, gropes, federacions... cadun es convidat a venir ambaissador de las practicas vivas de son territòri e actor del dialòg de lengas e culturas entre Pirenèus e Mediterranèa. Animacions, espectacles, partatge de vidèos en linha, conferéncias... Dètz meses de rencontres e d'escambis en preparacion del segond Forum Euroregional que se tendrà a la prima de 2018. 


Culturas popularas en dialòg : Las tradicions vivas al servici del dialòg intercultural

Animals totemics de Lengadòc e gigants catalans, caçolet e graixonera, bodega o xeremies (sansònhas de la Montanha negra e de las Isclas Balearas)... las culturas occitanas e catalanas son ricas de practicas e d'expressions vivas que se fan resson.
Aquelas tradicions, son per natura « popularas », rason per la quala lo projècte foguèt pensat tre l'origina coma participatiu. Aital, l'operacion convida totes los actors del territòri qu'o vòlon a s'associar a aquel grand projècte d'iniciativa populara per venir ambaissador del dialòg de las lengas e de las culturas entre Pirenèus e Mediterranèa. 

Del mes de mai de 2017, a la prima de 2018, lo CIRDÒC-Mediatèca occitana – establiment public francés en carga de la salvagarda, de la transmission e de la promocion de la cultura occitana -, la Fira Mediterrània de Manresa – mercat d'espectacles que recampa las creacions artisticas novèlas inspiradas de las especificats culturalas de Catalonha e de Mediterranèa –, e la Fira de Teatre Infantil I Juvenil de las Isclas Balearas – veirina granda del teatre jove public de las Balearas e d'endacòm mai-, vos propausaràn un cicle de rendètz-vos (animacions, espectacles, conferéncias...), moments d'escambis dobèrts al dialòg, a l'emergéncia d'iniciativas ciutadanas, que sos contenguts e los rencontres vendràn noirir lo Forum euroregional final, de la prima de 2018.



#CulturaViva : Venètz partejar en vidèos vòstras practicas culturalas

Coma la vidèo constituís un otís remirable de transmission, una granda crida a partatge d'imatges serà tanben lançada a totes los estatjants de l'Euroregion. Tre lo mes de julh, poiretz venir partejar las vidèos de las vòstras practicas tradicionalas sus la pagina Facebook del projècte :  https://www.facebook.com/Culturaspopularasendialog e sus las rets socialas acompanhadas del mot clau :  #CulturaViva. 

Guidas de cosina a l'entorn de las especialitats localas, captacions en dirècte (e dinamicas) dels rendètz-vos de vòstre grope de sardana, montatges vidèo, testimoniatges, scenetas...  Daissatz parlar la vòstra creativitat per partejar vòstra passion per las culturas popularas de vòstre territòri : tradicions culinàrias, totèms, jòcs e espòrts tradicionals, danças, sabers-far... 


Informacions practicas : 

Lo 9 de mai a 16:00
CIRDOC-Mediatèca occitana : 1 bis Bvd Du-Guesclin, 34500 Besièrs
Detalhs e informacions : secretariat@cirdoc.fr / 04.67.11.85.10. 

Daissatz un comentari

<