X

FAQ La FaBrica

Pòdi crompar o telecargar los CD, DVD, libres, que son sus La FaBrica ?

Òc...mas pas sus La FaBrica. Ensajarem tant que podèm de vos donar sus las fichas de ligams que vos permeton de tornar trobar las creacions sus d'autras plata-formas que, elas, propausan la venta o lo telecargament. Poirem tanben vos dirigir cap a de difusors especializats partenaris de La FaBrica.

Pòdi crompar e/o reservar ma plaça als eveniments sus l'Agenda ?

Non, vendèm pas de bilhetas e i a pas de sistèma de reservacions en linha sul site de La FaBrica. En contra, ensajam de donar totas las informacions necessàrias per assistir als eveniments. E demoram a la vòstra disposicion per respondre a vòstras questions a l'adreiça lafabrica@cirdoc.fr

Pòdi contactar los artistas sus La Basa ?

  • Òc, se del mens avèm e mostram un contacte, çò que o esperam serà majoritàriament lo cas.
  • Per trobar lo contacte que n'avètz mestièr, e que pòt èsser un site, un numèro de telefòn, una adreiça postala o mèl o un perfil suls fialats socials, rendètz-vos al pè de la ficha de l'artista, jos lo títol "Coordonadas de l'artista".
  • Se cap d'informacion de contacte es presenta o visibla, nos podètz cridar ajuda, en passant pel formulari jos la ficha "Escrivètz a La FaBrica", e vos ajudarem dins vòstra recèrca.

Ai remarcat d'errors sus una ficha, cossí far per o reparar ?

Per nos senhalar tot problèma, error, pèca, o per completar e modificar lo contengut d'una ficha, vos sufís simplament de nos escriure a info@cirdoc.fr en detalhant vòstre problèma. Podètz tanben utilizar lo formulari "Escrivètz a La FaBrica", present al pè de cada ficha.

Soi un artista occitan, ma ficha es pas dins La FaBrica, cossí far per i aparèisser ?

A malgrat dels nòstres esfòrces e de nòstra atencion, poguèrem segurament pas (encara) integrar a La Basa totes los artistas e las creacions qu'utilizan l'occitan. Aquò rai ! Per nos senhalar una manca, sufís de nos escriure a info@cirdoc.fr, en nos jonhent totas las informacions qu'avètz e que servirián a la redaccion d'una ficha : biografia/presentacion, contactes, fòtos (liuras de dreches), e totes los elements que vos semblaràn pertinents. Mai n'i aurà, melhora serà la ficha !

Qual es qu'escriu los articles Lo Mag ?

La còla de redactors del Mag es compausada d'agents del CIRDÒC, d'estructuras partenàrias (coma Lo Diari - IEO Occitània o Aquò d'Aquí), d'associacions culturalas, o encara d'independents.

Pòdi descargar los articles del Mag ?

Òc, podètz descargar los articles del Mag.

Pòdi difusar los articles del Mag ?

Òc, los podètz difusar, pasmens vos demandam de plan citar la sorsa.

Existís una version papièr dels articles del Mag ?

Òc, podètz aver una version papièr dels articles Lo Mag signats Lo Diari. Vos invitam a descobrir lo site web de Lo Diari.

A qué correspond la "mesura d'occitan" sus las fichas artistas o creacions ?

  • La Basa de La FaBrica referéncia los artistas o las òbras qu'utilizan pauc o pro la lenga occitana.
  • Luènh de tot jutjament de valor, evaluam aquí lo gra de preséncia de lenga occitana dins una creacion o un repertòri.
  • Aital, un cantaire que causiriá de s'exprimir pas qu'en occitan o quasi mostrariá una mesura mai plena qu'un espectacle mai que mai en francés mas simplament mirgalhat de mots o expressions dins la lenga, e çaquelà los dos auràn lor plaça parièr dins La Basa.
  • Tot parièr, una formacion essencialament musicala mas ligada a d'elements de cultura occitana poirà pas afichar una mesura de preséncia de l'occitan, e una mesura a mitat-plena podrà indicar un bilinguisme o un dispositiu que facilita l'accès linguistic e la compreneson (doblatge, jos-titolatge).
  • La mesura de preséncia de la lenga occitana es pas aquí que per donar una responsa informativa a la question : "dins aquela òbra, es qu'ausissèm o legissèm d'occitan : un pauc, a paritat, fòrça o pas briga ?"