Vaquí l'album novèl del Christian ALMERGE que se sona « De Schubert à Philae ».

Totjorn la meteissa recèpta amb de cançons francesas e internacionalas fòrça conegudas que son parodiadas sus una musica rock'n roll, coma lo tube intemporal « O sole mio » qu'es devengut « O solex mio », sens parlar de « Marylène » cambiada en « O macarèl ! ».

Se pòt trapar dins aquel disc un ventalh de tèmas dempuèi l'adaptacion de la troita de Schubert fins al singlar de la Malapèira . Poiretz tanben seguir dins lor viatge sideral lo Philae e la Roseta perseguisent la cometa Tchouri.

La tièra se completa amb qualquas composicions plan agradivas coma « Los castèls catars » o « Lo Cagaròl de Sant Bres », e subretot « Ma Tèrra Occitana », cançon esmoventa sus lo Nòstre País compausada per festèjar la Region novèla.

En tot 17 títols e 1h 20 de bon deliri per balhar de vam e oblidar lo temps d'una escota los embèstiaments de la vida, amb una granda varietat de cançons , de cançons que pòdon semblar leugièras mas ont son amagadas d'interessantas significacions.

(Source : Christian Almerge)