fabrica

Basa : Tota la creacion occitana
Licéncia Licence Ouverte


La Chambra d'òc, qu'ei-la aquò?

La Chambra d'òc es una Associacion qu'abarona personas que trabalhon lhi produchs de la tèrra, que fan lhi artisans, que vivon de torisme, que son actius per la renaissença linguística e culturala de las Valadas occitanas d'Itàlia.

Ente trabalha la Chambra?

La Chambra d'òc trabalha dins tot lo territòri occitan en Itàlia e sobretot dins las Valadas occitanas: Val d'Ols, Val Cluson, Val Germanasca, Val Pelis, Val Pò, Val Varacha, Val Maira, Val Grana, Val d'Estura, Val Ges, Val Vermenanha, Bueves, Poranh, La Clusa, Val d'Èler e Auta Corsalha.

Abo lo passatge de la Lei 482-99 "Nòrmas en matèria de tutèla de las minoranças linguísticas estòricas", la gròssa part de las comunas d'aquestas Valadas a deliberaa l'apartenença a la minorança linguística occitana, e las Províncias de Turin, de Coni, de Impèria e de Cosença an aceptaas las deliberas e definit lo territòri de tutèla.

Qui la lhi a dins la Chambra d'òc?

Dins la Chambra d'òc la lhi a d'artisans, de coltivators, de comerciants, d'aubergistas, de associacions culturalas, de grops musicals, e de personas que an de diferentas competenças.

Objectiu general

Elaborar e realizar projècts transversals as Valadas, abo na vision d'ensem del territòri per jónher la necessitat de riapropriacion linguística-culturala, l'internacionalitat del pòple occitan e la renaissença econòmica.

Coma trabalha la Chambra d'òc?

La Chambra d'òc trabalha per sectors e per projècts en collaboracion abo las personas disponiblas de las Valadas e abo las institucions: Comunas, Comunitats de Montanha, ATL, Parcs, Províncias e Regions.

Quals son lhi sectors mai actius dins la Chambra d'òc?

Aüra lhi a tres sectors foncionants:
1) sector linguístic-cultural que s'ocupa de:
a) formar d'ensenhaires
b) donar la consulença e la supervision per l'elaboracion e l'execucion de projècts de l'escòla
c) formar d'operators culturals del territòri
d) realizar d'experimentacions linguísticas, pedagògicas e culturalas sal territòri abo l'activacion de cors sus encharja de la Region Piemont - Assessorat a la Cultura
e) elaborar de materials didàctics
f) activar un Servici de la lenga, guichet linguístic per donar de servicis de consulença linguística a organismes públics e privats
g) realizar una editoria bilengas

2. sector internacional: es emportant lo trabalh que la Chambra d'òc fai ent'aqueste sector abo la partecipacion a diferentas manifestacions transfrontalieras coma "l'Estivada" de Rodés, la "Festa d'òc" e la "Feria" de Besièrs, e de Congrès internacionals.
Las Valadas occitanas son un pònt natural vèrs l'Euròpa, la chal masque valorizar aquesta lor richessa.

3. sector productiu:aqueste sector trabalha per la valorizacion del produch enogastronòmic e artisanal. S'es començat a distribuïr lhi produchs abo lo marqui "Chambra d'òc" dins diferentas botieas.
La linha "Ben minjat, ben begut, lhi sabors de las Valadas occitanas" vòl valorizar lo produch típic, lhi productors, lhi negòcis que lo vendon, lhi restaurants que lo semonon, sus una linha coerenta per crear un'image fòrta d'aqueste territòri.
Fin finala, la Chambra d'òc vòl abaronar lhi productors de totas las Valadas caracterizats da la qualitat di lors produchs e dal liam abo lo territòri, d'associacions, de grops de música e totas las personas que trabalhon per la renaissença.


Contactez nous a propos de cette page