X

Asondar : un son d'ara

Publicat lo 25 febrièr per Danís Chapduelh

Cronica escricha en seguida del concèrt del grop Asondar a l'Ostal d'Occitània (Tolosa), lo 23/02/2017.

fòto Ostal d'Occitània / La Topina
(photo Ostal d'Occitània / La Topina)

Asondar : inondar. Mot per mot « recobrir per las ondas », amb totas las accepcions del terme. O alara « se versar » : lo tròp-plen d'un aigat, sas desbondadas, sas emportadas, coma los d'una cultura tròp rica. Nòstras aurelhas i podràn ausir tanben « Al son d'ara », al son e al diapason de uèi, e s'i enganaràn pas tant lo grop Asondar sembla a son epòca. Amb soncament 4 musicians Asondar fa ja far un bon mièg-torn de planèta : Bretanha, Corsèga, Turquia, e plan solide Occitània, sens cap de dobte lo punt d'encontrada de tot aquel pichon monde. Darrièr la joinessa vesedoira del quatuòr pareisson los viatges personals de cadun : s'agís de Dupain, Du Bartàs, la Kreiz Breizh Akademi e Erik Marchand, Laf Duo, Bayati, Jacky Molard, Bijan Chemirani o encara Carlo Rizzo, aitant de referéncias de prestigi que plaçan la musica d'Asondar dins aqueste novèl paisatge de las musicas tradicionalas desbarrassadas d'una cèrta tradicion, mas pregondament ancoradas, terrèstras, etnicas. La libertat del jaz, de l'improvizacion, lo dialòg a quatre : Asondar permet a caduna de sas compausantas d'exprimir son plen potencial al servici del collectiu, dins un jòc permanent ont cadun va tirar l'autre cap a çò que li es personal e car, per l'ofrir al partatge.
Lo flabutaire Gurvant le Gac es a l'imatge del grop : sembla èsser fach de la meteissa fusta que sos instruments, garda los pès arrapats al sòl mentre que tot lo naut de son còs se mòu, ondula e se lèva lentament sens pertant jamai quitar sa plaça. Trantalhejant entre tèrra e cèl, sa musica raja sens falhir. I vesèm las marcas de la Sòrga de Dupain (2015), grop de Gurvant le Gac rejonhèt per desvolopar aquel repertòri : la meteissa fòrça bruta e sensibla, lo meteis folk progressiu descabestrat.
Thomas Lippens, lo percussionista « de l'ostal », seguís las envoladas melodicas : rodat a las danças enauradas e enaurantas de Mediterranèa (farandola, tarantèlas...) sap marcar d'un còp de cimbala sonant coma un gong la debuta de l'estransi, quora après s'èsser cercats, reconeguts, avalorats, los musicaires s'enlairan cap a d'autras nautors dins un revolum que tornarà càser mai tard, mai luènh, lent e suau.
Un vam e una calma mantenguts e soslinhats a mièja-votz per Pauline Willerval. A mièja-votz e mièg-violoncèl, los dos se rejonhent sovent : sabèm la semblança entre lo son de l'instrument e aquel de l'organ uman. Amb lo brut d'unes elements naturals tanben, e la musiciana passarà regularament de la ritmica de las còrdas a la doçor melodicò-malenconica de la gadulka, una viola d'arquet bulgara, que coloreja l'ensemble d'aires turcs, dels Balkans o del bacin mediterranenc.
Al còr del grop e del projèct, Titouan Billon, musician polit-instrumentista qu'usa aquí pas que de sa votz, a l'encòp jova e incrediblament fòrta e assegurada, que s'èra poscuda tastar dins Du Bartàs o encara Lo Barrut. De son experiéncia poeticò-polifonica, ne servèt l'amor per las paraulas de Leon Còrdas, mai que mai aquelas de la tèrra, que se plai de cantar, clamar, lançar a la volada. Son elas qu'asondan regularament lo concèrt, ne constituisson lo còr, amb d'autras, de tradicionals tornats visitar, mai crear.
Folk progressiu, jazz digressiu, amb una basa tradicionala plan assegurada, a tal punt que los musicians acaban per tornar descobrir, quasiment sens o voler, de ligams amagats entre los repertòris e aprenon pauc a pauc a los expleitar e a los portar en comun amb d'especificitats que son, a pas un solet momenton, de diferéncias.
L'ensemble, pas tant eteroclit, pren lo temps de se bastir, de se crear jos nòstres uèlhs e dins nòstras aurelhas, a fòrça de boclas ritmicas e melodicas d'ont s'escapan per butadas de pichonas improvizacions e variacions personalas. Asondar fa avant per ersetas, frèulas mas determinadas, un vai-e-vèni permanent que balha l'impression d'a penas nos fregar quora sèm ja, sens l'aver quitament sentit venir,...asondats.

Asondar sortís de residéncia de creacion al Chantier de Correns (Centre de creacion de nòvas musicas tradicionalas & musicas del monde) e fan partida del collectiu marselhés FeM, que deuriá liurar d'autras suspresas e creacions de nauta volada dins las annadas a venir.

Daissatz un comentari

<