X

Philippe Vialard

Estil : Cançon, Trad

Domeni d'activitat : Cantaire

Lenga : Occitan

Airal lingüistic : Lengadòc

i

Philippe Vialard es naissut sus Aubrac, e revendica aquela origina. L'occitan es una de sas lengas mairalas. Tota sa familha lo parla encara uèi.
Fa sos estudis musicals a París (licéncia de musicologia a la Sorbòna e cors d'escritura d'acordeon e de cant al conservatòri). Aquí, pren consciéncia de l'importància de la lenga occitana per la siás raices. Comença donc de tornar trobar intactes dins sa memòria d'aires tradicionals de la siá enfància que canta de nòu e adoba ; puèi ne ven tot naturalament a crear de cançons sus de tèxtes d'autors contemporanèus.
Publiquèt maites albums e obtenguèt de prèmis cadun per saludar son sens de la melodia e de l'adaptacion de poèmas e tèxtes en occitan. Urós d'aqueles succès, Philippe e sos musicians s'enregan sus las rotas. Son entosiasme e sa simplicitat fan d'el un artista sincèr que cèrca pas a entrar dins l'estrechura d'una mòda, mas puslèu a jogar amb los estiles, las epòcas. La siá mòda, la siá teoria, la siá tribú, es lo plaser de la musica. Es aital que capita sovent d'amassar, del temps de sos espectacles, totas las generacions.
Cap de besonh d'èsser "occitanista" (e d'alhors de qué vòl dire ?) per gaudir de sos concèrts, nos laissam prene per sa votz, menar per sa fòga e començam de trepejar sus aqueles aires tradicionals tornats far. La musica, aquò se partatja, e aquò, Philippe o sap.
Abitualament assetat en Occitània e dins la region de Montpelhier, Philippe visquèt tres ans a Rabat al Maròc. Dempuèi aquela riba de Mediterranèia, atentiu e receptiu a las influéncias musicalas que costegèt, contunhèt son trabalh de (re)creacion musicala en lenga occitana.
Tornat en França, aprèsta amb sos musicians un album nòu e una virada de concèrts.

Coordenadas de l'artista

48260 Nasbinals, France

Escrivètz a la Fabrica

<

SUIVEZ LES