X
Collectaire, dançaire, cantaire, instrumentista, formator en dança, ancian director del Conservatòri Occitan a Tolosa (31)

Pierre Corbefin es vengut a la dança tradicionala pels Ballets Occitans de Tolosa ont entra en 1962, e que ne serà lo coregrafa de 1969 a 1974. En 1970 participa a la creacion del Conservatòri Occitan de Tolosa, que ne serà lo director, e responsable de la dança, de 1984 a 2002. I farà, entre autres, las Jornadas de la Dança Tradicionala.

Formator en dança, transmet, dempuèi las annadas 970, la resulta de las enquistas que menèt sus l'airal cultural gascò-pirenenc : Gasconha e paises limitròfes (Agenés Naut), Bearn (val d'Aussau), tant dins l'encastre del Conservatòri Occitan que de l'associacion per la Cultura Populara en Agenés.

Pierre Corbefin escriguèt d'articles relatius a la dança tradicionala [Pastel, revista del Conservatòri Occitan, Trad'Magazine, Modal (FAMDT), Marsyas, site Internet de l'Institut Occitan de Pau, etc.]. Realizèt tanben, en collaboracion amb Bénédicte Bonnemason, un Inventari dels cercaires e collectaires en dança tradicionala, edicions FAMDT, Parthenay, 1995.

Pels estagis de dança qu'anima, en França e a l'estrangièr (Belgica, Espanha, Estats-Units, Itàlia), a mai especialament collaborat amb Henri Marliangeas, Marc Castanet e Patrick Cadeillan. Ponctualament, fa equipa amb Cyrille Brotto, Tomàs Baudoin, Gabriele Coltri, Pèire Boissière, Florent Coubard, Marinette Bonnert. Dempuèi 2005, mèna amb Philippe Marsac una experiéncia que tròba son perlongament natural dins l'animacion de bals a la votz.

En 1977, crèa, amb Monique Lamothe e Michel Ségonzac, lo triò vocal Lambrusc, experiéncia que viurà tres ans e donarà luòc a un album 33 torns. Aquel disc serà l'escasença d'amassar, a l'entorn del triò, de musicaires dels gropes Perlinpinpin Fòlc (Jean-Pierre Cazade, Alain Cadeillan, Patrick Cadeillan, Christian Lanau), Mont-Jòia (Jan-Mari Carlotti, Patrice Conte, François Dupont) e Bachàs (Miquèu Bianco).

Prestèt per alhors sa votz a maitas autras produccions discograficas (notadament, en 1990, a l'album sus Les Voix de la colleccion Musiques et Voix Traditionnelles Aujourd'hui editada pel Conservatòri Occitan).

(Fòto : Yves Sénécal)

Coordenadas de l'artista

+33 5 53 36 08 79

Escrivètz a la Fabrica

<