X
NIVEAU D'OCCITAN

Nocturnal d'errança

Estil : Poësia

Sector : Literatura

Airal lingüistic : Lengadòc

Annada de parucion : 2017

Creator: Bardòu, Franc

Editor : Editions Tròba Vox

i

Garatz-aquí : tenètz entre las mans un fais de vèrses alambrats.
Franc Bardòu i a liurat son desesper, sa ràbia e son descòr d'un mond que vei periclitar dins un cinisme abjècte, egocentric e van, menant cadun a l'orror de refusar l'Autre, a desamar globalament, puèi a descaire en solitud.
Fargat, cinc ans de temps, al fogal de patiments e de revolucions que non sabon mai nàisser, dins una lenga que non sap sempre pas morir, per amor qu'es lenga embrandada, qu'el saca, pentacòsta profana, al morre d'aquela societat que non se sap mai viure, lo poèta esmarrat desgruna sas nuèits sense sòm, un capelet de brasas, velhant, mas sense i creire gaire, als brutadors d'unes grands sers que tota vanitat s'i escampilhariá vent de cendres dins las flambas d'amors retrobats, d'amors que degun non sap pas mai viure.
Los mots son aicí los pavats d'una lenga en revòlta contra l'inanitat que non pòt que la menar pèrdre. Ja que cap mai revòlta, d'ara enlà, non la sauriá salvar. Mas en son còr brandant, aicesta lenga, ela, sap, en se consumissent d'amor despuèi son origina, cossí salvar tota justa revòlta. Anam lèu a las barricadas, per una poetica de l'insurreccion !

Daissatz un comentari

<