X
Lo hestau de las Nuits Atypiques que tornarà deu 4 de junh dinc au 25 de julhet en Sud-Gironda. Un vintenat d'artistas, de musicaires, de contaires, de comedians e d'autors que's seguiràn sèt setmanas de seguida dens divèrsas comunas girondinas. Musicas deu monde, tradicionaus, elèctro, jazz, poesia, mes tanben teatre e cinèma que seràn au programa.

Deu 4 au 8 de julhet, estagis e tanben ua Masterclass que seràn perpausats au public. Valentin Clastrier qu'animarà la Masterclass de sonsaina los 4, 5 e 6 de julhet a Vilandraut. Clastrier qu'ei un jogaire de sonsaina elèctroacostica. Qu’atenhó lo Gran Prèmi Charles-Cros dab lo son darrèr album « Sans titre générique » (2014). Au cors de la formacion, qu'explorarà las possibilitats ritmicas de l'instrument miejançant l'apregondiment deus còps de punhet. Que calerà l'estagiari qu’aja quauques annadas de practica e que’s hasca seguir lo son instrument. Lo nombre d'inscriuts qu'ei limitat a 12. Cyrille Brotto e Stéphane Milleret qu'animaràn l'estagi d'acordeon diatonic los 7 e 8 de julhet a Vilandraut. Cada dia que's debanarà dab l'un deus dus formators. Cyrille Brotto que perpausarà un tribalh centrat sus la melodia, l'estudi deu frasat de la man dreta e l'acompanhament de la man esquèrra, Stéphane Milleret, eth, que's focalizarà sus l'armonia e l'acompanhament. L'artista Guillaume Lopez qu'animarà l'estagi avançat de canta, un estagi de perfeccionament dedicat a l'interpretacion personau ; per çò qui ei de Matèu Baudoin, que s'adreçarà aus començants qui ajan totun ua practica regulara de la canta. Que'vs harà tribalhar la respiracion e las tecnicas vocaus, puish, en se basant suus repertòris de Bearn e de Lanas, que vs'iniciarà a las cantas de dançar, a la polifonia, etc.

Entà mei d'indicas : Tarifa Master class : 130 èuros, quinze òras d'ensenhament — Tarifa estagi d'acordeon : 70 èuros, dètz òras d'ensenhament — Tarifa estagi de canta : 70 euros, dètz òras d'ensenhament.

Daissatz un comentari

<