X

21

Feb

Lenga : Bilingue Occitan-Français

Nissa es Bellanda, la maion dei pantais : una mòstra alentorn de la Nissa "underground"

Del : 21 febrièr 2020 18:30

Al : 10 abril 2020 18:00

Luòc : Place du 14-Juillet, 34500 Béziers

Tipe : Mòstra

i

Del 21 de febrièr al 10 d’abrial de 2020, lo CIRDÒC – Institut occitan de cultura aculhís una granda mòstra d’art contemporanèu dedicada a la creacion niçarda, « en lenga dau país ».
Los artistas convidats, de Ben a Jànluc Sauvaigo, passent pel collectiu Nux Vomica, ofriràn una immersion dins l’univèrs abondós, ric e colorat de la cultura niçarda, largament mesconeguda. Fòrça rendètz-vos ponctuaràn l’eveniment : concèrt, conferéncias, projeccions, espectacle... Seguissètz la guida !

« Tant qu’on parlera notre langue, notre art sera contemporain »

Aquela citacion, fòrta e sèca coma un còp de massuga, inscrita per Ben sus una òbra aquesida en 2018 pel CIRDOC – Institut occitan de cultura, es a l’origina de l’exposicion Nissa es Bellanda. L’art contemporanèu d’expression occitana es viu, e plan viu. En particulièr lo que s’exprimís en occitan niçard, mercés a l’efervescéncia e al borbolh creatiu de Nissa que dona luòc, dempuèi de decadas, a un vertadièr reviscòl de la creacion en lenga nòstra, ferment d’una cultura de la resisténcia a l’uniformizacion, eretièra d’un imaginari d’una granda riquessa, a l’encòp mestissat e prigondament enraiçat. Aquela cultura es devenguda sosterrana a Nissa, es la de Bellanda, l’autre nom de la vila, que ne trobèm la traça tre l’epòca medievala dins La Vida de Sant Onorat, òbra del trobador Raimon Fairaut.

Bellanda la misteriosa

Bellanda, pels artistas convidats, es aital la part esconduda de Nissa, son ADN, son alma prigonda, luènh de las palhetas de la « Còsta d’Azur ». Protegís en son còr un concèpte important, quasi vital pel pòble dels « Cagas-blèas » ( l’autre escais dels Nissarts ) : lo pantais, estreitament ligat a l’istòria d’aquela pòrta dobèrta sus la Mediterranèa, e que servís de fial conductor a una forma de contra-cultura e a sa creativitat desbordanta. Una cultura « underground » coma o disèm en occitan... Son simbòl ? Una ratapinhata, sinonima de l’inversion dels còdis e de la creacion desbridada.

Los artistas de Bellanda

  • Jànluc Sauvaigo : pintra, poèta, compositor, musician, autor de bendas dessenhadas... Dempuèi mai de 40 ans, Jànluc Sauvaigo nos ofrís una òbra rica e polimòrfa, impregnada de subrerealisme. Lo long d’un viatge dins son monde, vos semblarà coma se seriatz amb el dins la rèirebotiga d’un estanquet de la ciutat esconduda. Un estanquet que fuma dins una carrièra escura ont podèm escotar cada jorn dr grops que jogan de blues, de fòlc, de jazz... al ritme dels mots que venon colorar una poesia a la sonoritat niçarda.
  • Serge Dotti : mainat del Babasoc (la vila vièlha de Niça), es pel teatre e l’art de la marioleta que dona vida als simbòls, als personatges-claus e al bestiari de la cultura niçarda.
  • Ben : presentat dins lo monde entièr, figura de l’abans-garda (amb lo movement Fluxus notadament), Ben es sens contèsta lo mai conegut dels artistas engatjats per la reconeissença e la promocion de l’occitan. Tre 1962 a Nissa, rencontra François Fontan (1929-1979), ideològ anticolonialista, pensaire del concèpt d’etnisme. Fruch dels escambis amb aquel grand occitanista : Ben s’engatja per son art contra lo « genocidi lingüistic », e pòrta las colors d’una Occitània liura.
  • Louis Pastorelli : « Après 10 annadas passadi fòra, m’en torni a Nissa a la fin dels annadas 80, convint qu’èra luèc dont porrii plenament dire cenque avii da dire ». En 1989 fonda amb sos complicis lo Hangar Saint-Roch, qu’es a l’encòp un luòc emblematic e collectiu d’artistas, plasticians, escultors, tocassèrs que metan en comun lor enveja prigonda de demostrar que podèm viure Nissa, e pas unicament « a Nissa ».
  • Vincent Calassi : dessenhaire, pintre, escultor, rejonh lo Hangar Saint-Roch tre la debuta de las annadas 1990 e s’engatja per far viure aquel luòc d’expression liure e dobèrt a totes. Mas tanben per la renaissença de la lenga nissarda, de las fèstas popularas. Aquò passarà notadament per la cançon, a travèrs lo grope Nux Vomica, emblematic d’aquel novèl pantai nissart.
  • Maurice Maubert : illustrator prolific, viatjaire inveterat, es de la tropa que dona son alma al Hangar Saint-Roch e a sas emanacions carnavalescas, artisticas, musicalas. Dins son trabalh apareisson de formas abstraitas e coloradas, nascudas de pigments, de tèrras, d’acrilica. Experimenta divèrsas tecnicas e expressions : pinturas, colatges, dripping, esculpturas, installacions, e realiza de tablèus que fan irrupcion dins la realitat, e que crean aital un espaci simbolic e imaginari.

Los eveniments a l'entorn de Nissa es Bellanda :

Del vernissatge a la barradura, la mòstra es ponctuada d'eveniments nombrós :
Divendres 21 de febrièr :
  • 18h00 // 2 conferéncias : « La remirabla vida de la BD occitana en la vila pantalhada de Bellanda » per Geremia Marçais (ensenhaire, traductor) + « Jànluc Sauvaigo, un beatnik perdut de la nissardituda » per Olivier Pasquetti (ensenhaire, doctorant a l’universitat de Nice-Sofia Antipolis) 
  • 19h30 // vernissatge en preséncia dels artistas, seguit d’un concèrt del grop Nux Vomica
Dimècres18 de març :
  • 10h // Madama Rata, un espectacle per tot public de Jànmarc Cana, dins l'encastre del cicle « Dimècres en familha ». Musicaire de La Bande à Cana, l’artista presta sa votz a una pichona mariòta ratapinhata que se sona Madama Rata, plan coneguda a Nissa per sos reportatges, micro-trepadors e punts meteo… mas tanben per son caractèr plan afirmat !
Dijoùs 9 d'abril :
  • 18h // Projeccion dels films Going Back to Nissa la Bella (real. Christian Passuello) e À propos de Nice (real. Jean Vigo), en preséncia de Christian Passuello e de Karim Ghiyati, director d’Occitanie Films
E tot lo long de la mòstra… De visitas escolaras nombrosas, e tanben de visitas sus demanda !

Informacions e contactes :

CIRDOC – Institut occitan de cultura Mediatèca (site de Besièrs)
Place du 14 Juillet – 34 500 BEZIERS
info@oc-cultura.eu
04 67 11 85 10

Daissatz un comentari

<