X

07

Jul

Lenga : Bilingue Occitan-Français

Universitat Occitana d'Estiu - Edicion 2020 : numerica e radiofonica

Del : 07 julhet 2020 00:00

Al : 10 julhet 2020 00:00

Luòc : 450 Rue Alexander Fleming, 34430 Saint-Jean-de-Védas

Tipe : Conferéncia

Airal lingüistic : Provence

i

Fin finala d’i soscar òm s’avisa que las armas per amaisar aquel marrit virús an pas res de novèl. Nosautres occitans las coneissèm plan. De temps que los reprimaires de las lengas minoritàrias las emplegan. Basta aguèsson mai de capitada contra aquela bestieta sornaruda de qualques mesadas d’atge que contra de culturas que tenon elas mai d’un milenari de temps. Per començar la distanciacion sociala a l’encòntre dels rustres qu’an lo topet de s’exprimir en public amb de mots o d’accents de son terraire conèissem. « Enebit de parlar breton e d’escupir per sòl » òc escupir dins lo plèc del coide las paraulas vergonhosas, netejar menimosament amb lo mocador e l’escampar dins la tina de las bordilhas. Dobidèm pas tanpauc la masqueta de se botar suls pòts per contaminar pas a nòstre entorn amb un parlar que fa ofensa a la lenga oficiala e subretot far empacha a sa transmeission. E l’aplicacion que se carga sul telefonilhet per vos avertir del vesin cargat del virús malfasent seriá pas la version modernizada del senhal, aquel objècte simbolic que los regents de la Tresena Republica fisavan, en espèra de punicion, a l’escolan qu’aviá daissat escapat qualques mots de la lenga de sas gents ?

« Èsser occitan deman » serà adonc lo tèma d’aquela universitat occitana d’estiu que se cambia de forma cambia pas de fons. Dire que sèm lèsts per afrontar lo monde que nos espèra vaqui l’escomesa que lo monde de la Marpoc amb sos partenaris an decidit de téner qué que còste e en despièch de las constrenchas sanitàrias de l’ora d’ara. Rasseguratz-vos, vos demandam pas de vos botar en fenèstra a solelhcòlc en picar de las mans e en entonar lo Se cante o la Copa Santa mas tot simpletament d’èstre presents a l’escota e de participar tant que far se pòt amb los mejans tecnics e informatics que metrem en plaça. E de segur amb l’esperança de se tornar trapar l’an que ven dins lo mòde convivial e frairal que ne sèm costumièrs.

Jòrdi PELADAN



PRESENTACION GENERALA


Dempuèi mai de quaranta ans, l’Universitat Occitana d’Estiu (UOE) de Nimes, portada per la MARPOC, constituís un rendètz-vos estivenc a l’entorn de l’actualitat dels sabers, del debat d’idèas e del rencontre cultural. 
Pel primièr còp de son istòria e per rason de la situacion sanitària actuala, l’UOE 2020 se debanarà del 7 al 10 de julhet dins son integralitat en version digitala, sus las ondas e sus Internet, mercés als partenariats nosats per la MARPOC amb Ràdio Lenga d’Òc Montpelhièr, la Rampe-TIO e lo CIRDÒC - Institut occitan de cultura. 

UNA EDICION 2020 ORIGINALA E INTEGRALAMENT DIGITALA


Ongan, e per tota la durada de l’eveniment, serà possible pel public interessat d’accedir gratuitament en linha e sus las ondas, als contenguts d’aquela edicion. 
L’ensemble de la programacion, de 11:00 a 18:30 serà aital retransmesa en dirècta sus Ràdio Lenga d’Òc Montpelhièr (radiolengadoc.com), partenari de longa data de l’UOE. 
Noveltat per ongan, las sessions de la tantossada - conferéncias e taulas redondas - seràn tanben prepausadas en dirècte mercés a una plataforma en linha de teleconferéncia, que donarà la possibilitat de seguir en vidèo los escambis e atanben de participar via lo « tchat », amb la mandadís de questions e de reflexions per intervenir dins lo debat. 

DEL 07/07 AL 10/07 : 4 JORNS D'ESCAMBIS E DE DEBATS

Una edicion de 2020 definitivament ancorada dins lo sègle XXI que la tematica « Èsser occitan deman ?», causida tre la debuta de l’annada abans los borrolaments qu’an tocat la planeta, ressondís tot particularament dins lo contèxte actual. 
Pendent quatre jorns, taulas redondas e conferéncias propausaràn retorns d’experiéncias, presentacions de projèctes innovants e estudis scientifics sus de questions d’environa (dimars 7 de julhet), d’innovacion pedagogica e de literatura (Poesia e transmission / dimècres 8 de julhet) e numericas (Numeric / dijòus 9 de julh). 
Coma 2020 marca tanben lo centenari de la naissença de Joan Bodon, la darrièra jornada de propausarà un fòcus sus aquela votz màger de la literatura occitana que sos ressons contunhan de se far ausir dins la creacion occitana contemporanèa (Joan Bodon / divendres 10 de julhet). 
E coma cada annada, lo Miegjornau estival de RLO, l’Ombreta d’estiu, vos farà viure al ritme de l’UOE en recampant dins son estanquet artistic e literari, qualques-uns dels convidats d’aquela edicion de 2020. 
Cada jorn, tres rendètz-vos vos seràn aital propausats : 
- 11:00 - 13:00 / L’ombreta d’estiu de RLO se met a l’ora de l’UOE (ràdio e video sus facebook) ; 
- 15:00 - 16:00 / Conferéncia (ràdio/visiò)
- 17:00 - 18:30 / Taula redonda (ràdio/visiò)


PROGRAMA DETALHAT (de modificacions e apondons son de preveire)

Jornada del dimars 7 de julhet : ENVIRONA / Environnement
- 11:00 : L’ombreta d’estiu  amb los convidats del jorn, Felip Carcassés e Joan Claudi Puech
- 15:00 : Conferéncia de Josiane Ubaud, lexicografa e etnobotanista del domeni occitan « D'una cultura dels sabers a una descultura inculcada »
- 17:00 : Taula-redonda sus l’environa - « Conciliar activitat economica e environa, l'exempla d'un territòri : lo massís de l'Aigoual »   (en francés), amb Claire Schneider (directritz de la filatura del Mazel), Noémie Cabannes (cargada de mission a la comunautat de communas Causses-Aigoual-Cévennes, "terres solidaires", sur "le pacte pastoral"), Thomas Flavier (director de l'estacion Alti Aigoual) e Josiane Ubaud.
Jornada del dimècres 8 de julhet :  POESIA E TRANSMISSION / Poésie et transmission
11:00 : L’ombreta d’estiu amb los convidats del jorn, Miquèla Stenta, escrivana, e Paul Martin, editor.
15:00 : Lectura-concèrt : Lutz de Max Roqueta, de Gisèla Pierra e Gilles Siouffi
17:00 : Taula redonda sus l’innovacion pedagogica amb : Gisèla Pierra (Ensenhaira-cercaira en sciéncias del lengatge), Gilles Siouffi ( Ensenhaire-cercaire especialista de l'istòria de las teorias linguisticas), Cristòl Causse (président de Zo Petaçon et chargé de mission pour le second degré) e Céline Serva (Conselhèra pedagogica per l’occitan dins lo primièr gra departament d’Eraut), Danís Galvier (ensenhaire del 1èr degrat) e Patric Albert (director del collègi Calandreta de Montpelhièr). 
Jornada del dijòus 9 de julhet : NUMERIC / Numérique
11:00 : L’ombreta d’estiu amb los convidats del jorn e Henri Maquet, artista.
15:00 : Conferéncia de Benazet Dazeas, director del Congrès Permanent de la lenga occitana
17:00 : Taula-redonda sus l'innovacion numerica amb : Benazet Dazeas, Marion Cornet (responsabla dels departaments Iconotèca, Filmatèca e Arts visualas, CIRDOC-Institut occitan de cultura), Maud Séguier, presentatritz de «Fargat a l’ostal » (Oc tele), Danís Chapduèlh (Redactor al DIARI, IEO-OPM), Robin Chouleur (estudiant), Amy Cros (jornalista a Tè.Vé.Òc).
Jornada del divendres 10 de julhet : JOAN BODON / Jean Boudou
11:00 : L’ombreta d’estiu amb los convidats del jorn e Sylvie Berger, artista.
15:00 : Taula-redonda sus Joan Bodon amb : Bernard Vernières (Doctor ès letra, ensenhaire de filosofia e d'occitan), Joan-Pèire Gaffier e Viviane Cayssials (director e guida de l’Ostal Joan Bodon), Ives Durand (artista), Joan-Loís Blenet (artista). 
17:00 : Conferéncia de clavadura de Felip Martel (Professor emerita, Universitat de Montpelhièr).
 

INFORMACIONS PRACTICAS 

Entresenhas : MARPOC : marpoc30@gmail.com
Difusion simultanèa de l’ensemble de la programacion sus las ondas de RLO Montpelhièr : radiolengadoc.com 
Live streaming per las conferéncias e las taulas redondas : sus la pagina Facebook de la MARPOC : https://www.facebook.com/marpoc30/

Daissatz un comentari

<