X

18

Dec

Olé ! parla occitan : Mans de Breish - Ont Se'n Va

Publicat lo 14 decembre per CIRDOC
Mans de Breish son en francés « les mains de sorcière ». Mas es tanben lo nom d'un cantaire carcassonés d'aquela generacion que, guitarra a la man, pòrta amb vam la lenga occitana dins totas las luchas tre la fin de las annadas 60. Del Larzac a las revòltas viticòlas, de Marti a Patric, aquela nòva cançon occitana sona coma una reconquista : la d'una cultura, la d'un país. Dins aquesta dralha, Gérard Pourhomme (de son nom vertadièr), s'i fa una plaça a despart e s’i fa crosar poesia e umor, revòlta e saviesa dins lo meteis gèste. E quin gèste ! 
Dempuèi un retorn sus disc en 2000 aprèp vint ans de silenci, Mans contunha de cercar l'universal darrièr sa fòrça tranquilla. N'atèsta son darrièr disc, Ont Se'n Va, en fòrma d'omenatge doble. Lo primièr es adreçat « als milions d'Africans deportats en esclavatge per bastir l'America Blanca e enriquesir los pòrts europèus de l'Atlantic ». Lo segond als « Loïsianeses que lor lenga francesa foguèt tant mespresada e combatuda que l'occitan a cò nòstre ». 
Una formacion de jazz Nòva Orleans, doncas, a l'accent lengadocian. Cal dire que los coires e la musica de carrièra pegan a la pèl de nòstre òme, de la debuta de la fanfara carcassonesa La Bobotte fins a Tonton à Faim... Dins Ont Se'n Va, l'anglés e lo francés venon occitan sens traïr la filosofia dels títols originals, polidament reïnterpretats, çò que permet a la votz redonda del cantaire de navegar luènh de tota frontièra estetica. Una fantasiá ? Non, una generositat naturala, e un plaser del jòc. De que tocar del det un caractèr comun a fòrça artistas afiliats al domeni occitan... 
Aital va, las practicas culturalas travèrsan las femnas e los òmes sens títol de proprietat, del Lengadòc a la Loïsiana. Son en movement, son lo movement, e son aquí entre de bonas mans... 

Per crompar lo disc : mansdebreish@orange.fr 

La còla del CIRDÒC 

Daissatz un comentari

<