X

Olé ! parla occitan : la Talvèra bufa sas quaranta candelas

Publicat lo 15 febrièr per la còla del CIRDOC
Une chronique mensuelle pour (re)découvrir la création occitane sous toutes ses formes. Portraits d'artistes, de penseurs ou d'artisans, annonce d'une actualité, présentation d'un courant, d'une pratique ou d'une tendance, le CIRDÒC vous présente sa chronique pour faire rayonner, aujourd'hui et demain, la culture en occitan. 

Lire la chronique sur le site de Olé Mag : ici !

« Es sus la talvera qu'es la libertat. » Als mots del romancièr Joan Bodon, una pichona còla de passionats de patrimòni cultural occitan a volgut respondre per los actes.
A Còrdas d'Albigés, dins los puèges tarnencs, al mitan d'un decòr medieval, existís una associacion que fa parlar d'ela plan al delai de tota frontièra departamentala : la Talvera. A l'encòp centre de documentacion e grop de musica, la Talvera bota la frucha de sas recèrcas en practica, de balèti en balèti, sens oblidar que tota desmarcha scientifica s'apuèja sus una presa de consciéncia activa. Entre transmission e creacion, donc, l'associacion es venguda una vertadièra referéncia. N'atèsta son catalòg. De las sortidas discograficas, dels recuèlhs de collectatges, dels actes de collòquis o dels obratges a destinacion del jove public : s’agís aquí de s'interessar a tot çò que tòca al patrimòni local. Contes e legendas, istòrias e cançons, mas tanben figuras emblematicas e mestièrs desapareguts, del mont Losèra fins a las planas erautesas en passant per lo Roèrgue, la Talvera desvela un mond abondós, mòrt o vivent, real o imaginari, qu'a fach la vida de las femnas e dels òmes del pais. Amb qualques viatges al Portugal o al Brasil...
Ongan, la Talvera bufa sas quaranta candelas, e marca lo còp amb una seria d’eveniments, generoses, entre concèrts e collòqui. Costat parucions, coma a l’acostumada : una mina d’aur, e tant de pòrta d’intrada sus aquel mond que nos enròda. Sus çò que carrejam, inconscientament, inscrich fin fons de nòstras memòrias. Se la cultura es un pont, nos embarca, sul pic e sens que nos ne mainem, entre ièr e deman.

La còla del CIRDOC. 

www.talvera.org

Crédit photo : Dominique Delpoux

Daissatz un comentari

<