X

01

Mar

Olé ! parla occitan : los totèms occitans e carnaval

Publicat lo 01 març propausat per CIRDOC
Qué representa tan ben l’esperit de convivéncia e de paratge car a la cultura occitana coma lo carnaval ? Los totèms !
Dins Erau, l’un e l’autre van tanben sovent de parelh…
Mas, un totèm, qu’es aquò ?
Animals, gigants, quimèras o vegetals fetiches faches de tela, d’acièr o de fust, son d’un còp objècte de paur e de devocion. De totèms, n’existissen un pauc de pertot dins lo mond. En França, lo litoral lengadocian fa vertadièrament figura d’epicentre : dins tota la region, aquò’s pròche d’un seissantenat de comunas que’n sortisson un dins lo temps dels jorns de fèstas, mai qu’aquò quand la prima poncheja son nas.
Lo Polin de Pesenàs, lo Buòu de Mesa, lo Camèl de Besièrs, lo Cese de Montaren o lo Mugel de Balaruc… “Encarnan l’esperit dels luòcs, es a dire un luenchenc davancièr qu’es a l’origina del país o que l’a salvat de qualque catastròfa. Una legenda fonda sa popularitat”, se pòt legir sus lo siti Internet de la Federacion dels totèms occitans e catalans. Dempuèi 2017, Totemic s’estaca d’efiech a federar totas las energias que fan viure son patrimoni seculari, rare, e de mai preciós, amb la transmission per axe principal. E la reconeissença institucionala en parallèl. “Lor avenidor depend de nòstra capacitat de representar çò de qué eretam e çò que legam.”
Carnaval apròcha, las sortidas de totèms tanben. E, per anticipar sus la fin de l’ivèrn, una novèla que rescalfa lo còr : lo 9 de març, la comuna erautenca de Sant-Cristol aculhirà las acordalhas de la Baragogna e du Tamaròu. La Baragogna, béstia estranha que viu al fons d’un potz e devòra los mainatges de Sant-Cristòl, se fiançarà al Tamaròu de Vendargues, quimèra de la tèsta de conilh, amb d’alas de cigala amb una coa de claveta. L’escasença ideala per faire la fèsta, faire carnaval mas tanben intronizar, dins la familha prestigiosa mas estranha dels totèms, l’Aspergi de Sant-Cristòli-de Blaia…
De totèms, se’n fargan cada jorn, o coma, e amb els de novèlas tradicions.

La còla del CIRDÒC

www.totemic.occitanica.eu

Daissatz un comentari

<