Sintetizador dins una man, galobet dins l’autra, l’Arlatenc Henri Maquet s’es fargat una reputacion de las bèlas al delà dels mitans ligats a las musicas occitanas. La recèpta ? Comprene qu’aquelas practicas musicalas, « popularas », « tradicionalas », « folcloricas » (apelatz aquò coma voletz) fòrman pas una estetica, mas permeton realament de transcendir las capèlas. Comprene, tanben, que la practica musicala es l’expression d'idèas, de simbòls, de culturas, d'imaginàrias, e que tot aquò passa d'en primièr per los mejans del bòrd, per çò qu'enròda lo musician plan segur, son environament dirècte. Per de qué la pèira angulara de l’art d’Henri es la fabricacion d’instruments de canavèra, en cana de Provença, aquela « mala planta » emblematica del litoral occitano-provençal. Aquel saber-faire complèxe restaca nòstre òme a las musicas popularas dels quatre cantons del mond, tanben a de costumas luènhas. E mai se manca de pròvas concrètas, sèm prèst de jogar que la canavèra compta demest los primièrs materials utilizats per homo sapiens per desvolopar sa pensada en musica…
Uèi encara, de practicas ritualas enròdan aquela planta e sus usatges, multiples, de l’arquitectura a l’agricultura en passant per de cresenças nombrosas.

A las pòrtas de Camarga, Henri apren, obsèrva, recòlta, copa, grata, puèi fa sonar la canavèra. Li fa jogar d’aires populars provençals plan segur, mas pas unicament. La fa vibrar al ritme de sas maquinas electronicas de pòcha tanben. L’acorda a aqueles aires que travèrsan las frontièras. Jòga amb los còdis : l’ancian, lo modèrne, la natura, la cultura… Mescla tot aquò dins d'aventuras nombrosas. Demest aquelas, Delta Sònic, sòrta d’òme-orquèstra del tresen millenari, creator d’un movement talhat per lo futur : la « musica tradicionala aumentada ».

La còla del CIRDOC

www.deltasonic.co/henri-maquet.com