fabrica

Basa : Tota la creacion occitana
Licéncia Licence Ouverte
Feràmia

Feràmia

Domaine d'activité : Groupe / Collectif
Genre : Pop/Rock Rap/Reggae Électro Jazz/Blues
Secteur : Musique
Aire culturelle : Languedoc
Occitan : Tot en òc
Support : Spectacle vivant
Date : 2015
Membres : Louis Pezet : chant, basse fretless, guitare, machines
Hugo Collin: saxophone soprano et ténor, Fender Rhodes, percussions
Ludovic Schmidt : trompette et bugle

Simon Flouret : batterie
Aurelio Espinoza : basse
Ligams



 Format en 2015 per Louis Pezet e Hugo Collin, Feràmia es un grop tolosan de musica actuala occitana.

Sas influéncias eclecticas, de l'electro a la cançon en passar pel jazz e qualques excursions etiopianas, dona a ausir una lectura originala de l'occitan e de sos universes. Lo primièr album de feràmia, "Lo drac pòt èsser tanben una soca", pareis en setembre 2016.

Feràmia, bèstia fèra e ferotja, salvatja, aquí amb un tèrme de conotacion mitologica, fantastica. Lo mot Feràmia fa referéncia aital an aquestas creaturas que los fantasmas dels òmes an menats a la vida al fial dels atges. Mai qu’una identitat, encara en construccion, es una ambicion que pòrta aquel nom. L’ambicion de tornar trabalhar la literatura occitana, la lenga, son bestiari, e de fach son univèrs, a travèrs una musica vivaça e multipla… Aquí pr'aquò, cap de fossilizacion nostalgica de rasigas perdudas, Feràmia vòl pas tornar constituir un musèu de mai, agent per objectiu de defendre una cultura o un patrimòni, que se substituiriá a la memòria dels òmes. La tòca seriá puslèu de rainalar de nuèch dins aqueles musèus, de ne rompre las veirinas, de raubar tot çò que tenon, de ba s'emportar dins una iscla, e, fisèls als ensenhaments del mètge Monroe, de los tornar bastir, de los ibridar, de lor bufar vida e salvatjariá, per crear de feràmias novèlas, de creaturas fantasticas novèlas.

La musica portada per Feràmia se vòl tanben bassacaira d'ataücs. L’auditor ausirà pas aquí de musica tradicionala occitana, e tanplan benlèu s'estonarà del descalatge entre lo dire dels tèxtes, per exemple de poèmas occitans de la debuta de sègle XXen, e lo lengatge musical utilisat dins l’interpretacion. Perque n'espelís quicòm que s’aparelha mai a Frankenstein qu’a la recitacion de poèma amb acompanhament musical. E tan melhor: Feràmia voldriá escapar a una tendéncia actuala de l’industria culturala, que nos abeura de títols que ne coneissem tot quitament abans de los aver escotats perque replican sens relambi de recèptas, de biaisses de far, que nòstras aurelhas ne son acostumadas. Feràmia es ni de « pòp-ròck », ni de « jazz-mestissat », ni mai d’ « electrò-lounge-world-tendéncia Aïti » o de que te sabi pas encara, es pas tanpauc de musica « fusion ». Lor musica, la voldrián bordejaira, susprenenta, desaisenta puèi serena, tintainanta puèi destructurada. D'aicí enlà, se poirà conéisser l’influéncia de la musica etiopiana, la poténcia de las instrumentacions dub, dels repics cocarèls, de ritmicas electrò, o encara l’influéncia de grands noms jazz american, e mai poirem assistir a una conferéncia d'aucelalha.

Çò qu’interèssa Feràmia es doncas la prosodia de la lenga, l’univèrs mental que pòrta, e musicalament, tot çò que li passa jos la man. Aital, dins lo primièr album « Lo drac pòt èsser tanben una soca », a costat de poèmas d’autors de la debuta del sègle XXen, coma Lafont, Roqueta, Camprós, Còrdas, Galtièr o Alhièr, figuran tres tèxtes originals que s’inspiran de l’imagenari occitan. Per Feràmia, es un lengatge que pòt servir a exprimir tan çò que foguèt coma çò que serà. La pastorèla, la pastora de « Quora vendrà? », pòt èsser un pastora vertadièira, mas tanben una anarquista veganò-maniaca, una caissièira al ponhet macat, una geek aganida, una accionària qu’espia ansiosament los augurs de la borsa, o encara, ta maire. A l’auditor de ne decidir. Feràmia es un grop modèst e jove encara, que demanda pas que de partejar e bastir un univèrs novèl, amb vosautres, public adorat, que va crompar lo nòstre album e venir veire los nòstres concèrts.






Contactez nous a propos de cette page