fabrica

Basa : Tota la creacion occitana
Licéncia Licence Ouverte


La companhiá


Creada en 1974 per Jean-Louis Blénet e Bruno Cecillion, La Rampe-TIO es una companhiá professionala qu'a pausada la cultura occitana al centre de son metòde artistic. Sus aquelas basas, developèt una creacion fòrta originala, diversificada, per un public curiós, apassionat de descobèrtas e per una populacion desirosa de tornar trobar las emocions d'una lenga e d'una cultura millenàrias. Per aquela posicion culturala, La Rampe-TIO pòrta al monde un agach singular de la societat, una actitud engatjada de resisténcia a la mondializacion de la pensada unica.

Patrimòni e Creacion contemporanèa son los aisses de la nòstra accion per far descobrir las òbras màgers del teatre en lenga d'òc e far conéisser una escritura dramaturgica occitana contemporanèa. Per la nòstra dobèrtura als autors, creators, meteires en scèna d'orizonts divèrses, exploram de camins inesperats per la creacion occitana. Las capitadas publicas e una difusion excepcionala per una companhiá independenta (120 a 130 representacions annalas, totes espectacles mesclats) validan la pertinéncia del nòstre metòde.

Per afirmar son identitat e son metòde, lo Théâtre La Rampe a pres lo nom de LA RAMPE-TIO, Teatre Interegional Occitan. Marca l'evolucion de la companhiá en precisant son espaci real d'accion e de difusion : « un Teatre d'expression occitana per l'ensemble dels paises d'òc ; per dire dins son ample tota la riquesa del teatre d'òc d'ièr, de uèi e de deman. »

Installada dins los ancians entrepauses de fust « Vergne » a Montpelhièr, la companhiá es implantada al còr d'un moviment de creacion, de reviscòl de la dinamica occitana qu'imagina e construís amb las associacions, los estudiants, los mèdias novèls, la societat de deman.

Creation, difusion mas tanben formacion !

Amb Claude Alranq, meteire en scèna, escrivan, comedian e ancian director del Departament de las Arts de l'Universitat de Nissa-Sophia Antipolis, la companhiá a tanben creat en 1999, la Licéncia Professionala « Acteurs Sud ». Aquela foguèt la primièra licéncia professionala creada en França dins lo domeni de las culturas meridionalas. Aquela experiéncia soslinha lo nòstre interès pels projèctes de formacion que la companhiá desvolopa amb d'estudiants, actors e creators.

Transmetre, renovelar, inventar una creacion occitana, es la demarcha de La Rampe TIO. « Per far dardalhar un Teatre dels paises d'òc ».

La Rampe-TIO es sostenguda per : las regions Lengadoc Rosselhon Miègjorn Pirenèus, PACA, Aquitània-Lemosin-Peitieus-Charantas, los departaments de Nauta Garona, d'Eraut, Montpelhièr Metropòli e las vilas de Tolosa e Montpelhièr.



Contactez nous a propos de cette page