Còr de Lop es un grop de folk medieval en lenga occitana, format de joves musicaires que vivon a Buenos Aires (Argentina).

I a bèl briu, del temps dels crotzats e dels senhors feudals, dels monges mendicaires e dels abats grassets en rauba de seda, èran plan pauc los que gausavan sortir de las sendas de la Glèisa e autres camins regats. Qu'aquí ont i aviá pas cap de rota, pas de glèisa, pas de tèrra de laurar, s'espandissiá la sèlva, maine del lop e d'aqueles que vivián coma de lops, salvatges, bandits, faidits, fòra-la-lei, oblidats de Diu, culheires, caçaires, montanhòls de tota borra, adoraires de dius ancians : de Còrs de Lops.

E aqueles esperits de lop qu'entravan e sortissián d'aquesta selva amistosa e protectriça portavan amb eles un tresaur que degun lor podiá far quitar, e mai quora davalavan sus las fièiras e los mercats : lor musica.

E aquò foguèt d'eles que se levèt la votz cruda e pagana que seriá puèi ondrada e abelida pels trobadors de lenga d'òc.

Perque los lops cantavan ni pel Senhor nimai per sa maire, entonavan pas de cantics e animavan pas de romavatges, mas parlavan de causas vulgaras e profanas, dels ladres e dels leproses. Se trufavan de còps dels poderoses mas cantavan mai que mai las amors. Aquel trobar floriguèt e fruchegèt en tèrra catara, en s'espandissent e se trasmetent fins a las termièras foscas de las tèrras occitanas, dins maitas autras lengas e maites autres sons, mas aquò's una autra istòria...